Jorda rundt med 12 bøker og anna informasjon frå biblioteket
No er det snart ferie og som vanleg blir det då sommarstengt i fire veker. Difor kan det vere lurt å ta ein tur innom biblioteket før det stengjer. Vi føl smittevernreglane med å bruke handdesinfeksjon, halde avstand og vere heime om ein er sjuk, så det skal vere trygt å gå på biblioteket.
Om du ikkje vil låne papirbøker, kan e-bøker eller e-lydbøker vere eit alternativ via appen BookBites. Meir informasjon finn du på nordhordlandsbiblioteka.no. Ta elles kontakt med biblioteket om du treng hjelp.
Også i år er vi med på den digitale versjonen av «sommarles». På BookBites er det og mange e-bøker for barn.
Nytt i år er at vi inviterer vaksne lesarar med på ei reise jorda rundt. Så om du ikkje kan reise fysisk, kan du reise i bøkene. Strilabiblioteket har laga til eit leseopplegg der vi les ei bok i månaden frå ulike land. Reisa startar i Sør-Amerika og endar opp i Australia neste vår. Reglane er enkle. Du fyller ut eit lesepass og for kvart av dei 12 landa du har lese frå, får du eit lodd i trekninga om ein premie. På nettsida nordhordlandsbiblioteka.no finn du meir informasjon og boktips. I biblioteka blir det og laga utstilling med bøker frå ulike landa.
I slutten av juni vert det sett ut bokkassar, ein med bøker for vaksen og ein med bøker for barn, i gapahuken på Matre og i Botneneset på Sandnes. Der er og ei hylle med bøker i butikken på Sandnes.
Då står det att å ynskje alle ein riktig god lesesommar.
Siste opningsdag før ferien er:
- Sandnes: måndag 29. juni.
- Hosteland: tysdag 30. juni
- Matre: torsdag 2. juli
Biblioteket opnar att:
- Sandnes: måndag 10. august
- Hosteland: tysdag 4. august
- Matre: torsdag 6. august
Tekst: Kjellaug Bolset Strand, biblioteksjef