Masfjorden kommunale kraftfond

OM KRAFTFONDET:
Næringsarbeidet i kommunen har dei siste åra vore konsentrert kring forvaltning av kraftfondet. Kraftfondet er midlar kommunen får som følgje av den kraftutbygging som har funne stad i kommunen gjennom at regulator/ BKK må innbetale ei avgift (konsesjonsavgift) til kommunen som går til eit fond i kommunen. Fondet og dei årlege konsesjons- avgiftene utgjer det som ein kallar for Kraftfondet. Ein får no tilført om lag 2 mill.kr. årleg. Kraftfondet skal i hovudsak nyttast til næringsføremål. Fondet kan og nyttast til kommunale tiltak. Det kan ikkje gjevast stønad til sanering av gjeld eller til den daglege drifta av verksemder og kommunen.

Midlane i fondet kan berre nyttast til investeringar i varige driftsmidlar. Stønad gjennom kraftfondet
kan gjevast i form av tilskot eller lån. Samla finansiering frå kraftfondet til private næringstiltak skal
som hovudregel ikkje overstige 25 % av den samla kapitaltrongen for eit prosjekt. Ved bedriftsutvikling kan det gjevast inntil 75% finansiering. Kommunestyret nemner opp styre for kraftfondet. Kraftfondsstyret er for tida identisk med formannskapet. Frå administrasjonen si side har i all hovudsak ass. rådmann Svein Helge Hofslundsengen arbeidd med kraftfondssakene.

Forvaltning av kraftfondet følgjer av vedtekter fastset av kommunestyret.
Det overordna målet med å bruka kraftfondet er å fremja etablering av nye verksemder, og å vidareutvikle eksisterande verksemder. Som del av kommuneplanen skal det lagast ein eigen næringsplan. Denne skal gje grunnlag for prioritering av prosjekt. Næringslivet i kommunen bør trekkjast aktivt med i utarbeidinga av ein slik plan. Planen skal innehalde strategiar for kommunen sin kvinne- og ungdomsretta tiltaksarbeid.

Eksempel på prosjekt som kan få stønad:

* Kommunalt tiltaks- og næringsarbeid,
til dømes: næringsplanlegging, etableringsprosjekt, samarbeid skule/næringsliv og
stadutviklingsprosjekt.
* Fysisk tilrettelegging av for næringsverksemd,
til dømes: kommunal tilrettelegging av næringsareal,fysisk stadutvikling, infrastruktur for
reiseliv, vassforsyning.
* Bedriftsutvikling,
til dømes: etableringsstipend, opplæring, produktutvikling,marknadsføring, marknads -
undersøking og planlegging.
* Investering i bedrifter,
til dømes: utstyr, maskiner og bygningar ved oppstart og utviding av bedrifter.

Det er utarbeidd eige søknadsskjema for bruk i samband med søknad om lån/tilskot gjennom kraftfondet.

Forutan forvaltning og behandling av søknader kring kraftfondet kan kommunen hjelpa med å formidla kontakt og orientera om andre offentlege stønadsordningar. Desse ordningane er i hovudsak forvalta gjennom Innovasjon Noreg tidlegare SND.

Det er ledig industriområde i alle delar av kommunen – Kvamme – Haugsdal – Krossleitet og Matre.
Kommunen har om lag 30 GWh ledig konsesjonskraft til disposisjon som kan nyttast til delvis subsidiering av industriverksemd.

Kommunen må gjennom kommuneplanen prøva å tilretteleggje forholda best mogleg med tanke på næringsutvikling.

Tekst: Svein Helge Hofslundsengen
Foto: Scandion