Reglement for Masfjorden vassverk

 

STIKKLEIDNINGAR - VILKÅR FOR TILKNYTING
(Vedteke av Masfjorden kommunestyre 07.09.00, Sak PS 83/00)

1 GENERELT
1.1 Føremål
Reglementet skal sikre:
- ein lovleg og optimal styring av offentlege og private leidningsanlegg
- etablering av gode, driftssikre og økonomiske leidningsanlegg med omsyn til kvalitet
- transport og distribusjon av godkjent drikkevatn i rikeleg mengde

1.2 Heimel
Kommunestyrevedtak Sak

 

1.3 Virkeområde
Reglementet gjeld for leidningsanlegg som er - eller skal kopla seg til Masfjorden vassverk.

1.4 Ansvar for å retta seg etter reglementet
Eigar av private leidningsanlegg må godta dei vilkåra som kommunen set for å få knyte seg til
vassverket.

 

Eigar er og ansvarleg for at eigen huslyd, leigetakarar og andre som nyttar leidningsanlegget rettar seg etter reglementet.

 

Reglementet er og bindande for dei som prosjekterer, utfører og kontrollerer arbeid på
leidningsanlegget.

1.5 Handheving
Reglementet skal handhevast av kommunen v/ rådmann.

1.6 Klagerett
Ein kan klage på vedtak gjort i medhald av dette reglementet. Klagefrist er 3 veker (jf. forvaltings - lova). Det er Utval for teknisk og miljø som handsamar klagen.

1.7 Endringar
Kommunestyret kan vedta endringar i føresegnene i reglementet.

1.8 Dispensasjon
Når det ligg føre særlege grunnar, kan rådmannen gje dispensasjon frå føresegnene i reglementet.

 

2 LØYVE TIL TILKOPLING TIL KOMMUNAL LEIDNING
2.1 Definisjonar
- Leidningsanlegg femnar om innvendig og utvendig anlegg.
- Innvendig anlegg femnar om alle anlegg i bygning.
- Utvendig leidningsanlegg femnar om alle installasjonar frå og med tilkoplingspunkt på
kommunal hovudvassleidning og fram til grunnmur.
- Med stikkleidning meiner ein ein privat leidning som fører vatn til ein eller fleire eigedomar.

2.2 Søknad
Ein må søke om byggeløyve for alle tiltak som femnar om nytt leidningsanlegg (jf plan- og bygnings - lova). Søknads-skjema kan ein få ved å vende seg til kommunen. På dette skjema søker ein om:
- løyve til å knyte seg til vassverket
- løyve til å utføre arbeidet
- godkjenning av ansvarleg søkar, prosjekterande, utførande og kontrollerande for tiltaket

Kart og teikningar i 2 eksemplar må fylgje med søknaden. Dette gjeld:
- situasjonskart, målestokk 1: 500 eller 1: 1000.
- detaljteikningar i naudsynt omfang

For arbeid som ikkje er starta opp innan eit år fell løyve bort.

Ein treng ikkje søke på nytt når det gjeld utskifting av utstyr som ikkje medfører endringar av eksisterande leidningsanlegg.

2.2.1 Avtalar
Ved søknad om løyve til å kople seg til vassverket skal det leggast ved avtalar i følgjande tilfelle:
- når deler av leidningsanlegget skal leggast over andre sin eigedom
- når det er fleire som eig det same leidningsanlegget
- når særskilde tilhøve tilseier det
Desse avtalane kan ikkje avlysast utan samtykke frå kommune. Dette må gå klart fram i avtale - teksten. Der ein vel å tinglyse slike avtalar, treng ein ikkje å ta dette med.

2.3 Godkjenning av søknad
Når søknaden er ferdig handsama av kommunen, vil ansvarleg søkar få melding om løyve til å sette i gang arbeidet.

2.4 Rapportering
Den som utfører arbeid på leidningsanlegget må sende oppdatert situasjonsplan til kommunen. Situasjonsplanen skal vise alle stikkleidningar og utvending anlegg. Dette kjem i tillegg til ferdigmelding.

2.5 Synfaring
Kommunen har rett til når som helst og utan varsel å ta synfaring på eksisterande leidnings-anlegg og anlegg som er under bygging.

Ei slik synfaring gjer ikkje at kommunen overtek ansvar som ligg på eigar, ansvarleg utførande eller tredjemann.

2.6 Material og utstyr for leidningsanlegg
Alle materialer og alt utstyr som blir nytta i leidningsanlegg skal vere godkjent av Godkjenningsnemda for sanitærmateriell (GNFS) eller NS-sertifisert. Dette gjeld så sant ikkje godkjenninga ligg under andre myndigheiter iflg. lovar og forskrifter.

3 DRIFT OG VEDLIKEHALD AV LEIDNINGSANLEGGET
3.1 Anlegg- og vedlikehaldskostnader
Der kommunen gjer abonnentar løyve til å montera kummar, stengeventilar m.m. på kommunen sitt leidningsanlegg, må abonnenten sjølv betale utstyret og arbeidet. Kommunen tar over utstyr og vedlikehaldsarbeidet når anlegget er ferdig.

Stikkleidningar og anboringsklave er ein del av det private leidningsanlegget og skal vedlikehaldast av eigar.

3.2 Utbetring av feil eller manglar
Kommunen kan krevje at eigar utbetrar eller legg om leidningsanlegg som er i strid med dette reglementet (jf bl.a forureiningslova § 22 og plan og bygningslova § 89). Dersom eigar av leidningsanlegget ikkje fylgjer eit slikt pålegg frå kommunen, kan kommunen utbetre eller legge om leidningsanlegg for eigar sin rekning. Kommunen skal varsla eigaren skriftleg før eit slikt arbeid blir sett i gang.

3.3 Tilknyting til vassverk
Tilknyting til Masfjorden vassverk skal utførast av godkjent firma etter rekvisisjon frå kommunen. Ynskjer abonnenten å kople seg frå vassverket må dette arbeidet og gjerast av godkjent firma etter rekvisisjon frå kommunen. Abonnenten må sjølv betale desse rekningane.

3.4 Stengeventil

3.4.1 Innvendig hovudstengeventil
Einkvar bygning skal ha innvendig hovudstengeventil plassert før fyrste avstikk. Ved rekkehus og liknande treng ein ikkje ein slik ventil, men då må det etablerast ein utvendig hovud-stenge-ventil.

3.4.2 Utvendig hovudstengeventil
På ein kvar utvendig stikkleidning skal det etablerast ein utvendig hovudstengeventil så nær hovudleidning som mogeleg. Ved forgreining av stikkleidning skal det etablerast stengeventil i forgreiningspunktet.

3.5 Stenging av kommunal eller privat leidning
Stenging av kommunal vassleidning for å utføre arbeid på privat vassleidning kan berre gjerast av kommunen på dei tidspunkt som kommunen fastset. Eit firma som ynskjer å stenge ein kommunal vassleidning utanom desse tidspunkta, må sjølv betale kostnadene.

 

Utførande firma som tingar stenging av kommunal vassleidning er ansvarleg for å varsle alle abonnentar som blir råka av ei slik stenging.

 

Kommunen kan stenge vassleidningar utan varsel når ein brann eller eit arbeid krev det.

3.6 Vasskvalitet og vassforbruk

3.6.1 Vasskvalitet
Kommunen syter for at det rutinemessig blir teke vassprøvar på fastsette stader. Desse prøvane blir analysert av akkreditert laboratorium.

 

Kommunen har til ei kvar tid rett til å ta vassprøvar frå eit privat leidningsanlegg for å kontrollere vasskvaliteten.

 

Abonnenten må melde frå til kommunen viss ein ynskjer å ta ut unormalt store – eller støtvise vassmengder.

3.6.2 Vassmålarar
Abonnentar kan be om å få installert vassmålar og betalar då ei årleg leige for denne.
Det er kommunen som eig vassmålarane. Dei er og ansvarleg for utlevering og vedlikehald.

Vassmålar skal monterast inne i bygning. Vassmålaren må plasserast frostfritt og slik at det er lett å lese av forbruket. Det er abonnenten sjølv som betaler for montering av vassmålar. Arbeidet må utførast av godkjent firma.

 

Kommunen sender kvart år eit skriv til abonnentar som har vassmålar. Der blir dei bedne om å lese av vassforbruket, skrive det ned på eit avlesningskort og returnere kortet til kommunen.

3.7 Vasstrykk
Masfjorden kommune føreset at trykket frå hovudvassleidning i Andvik ikkje skal overstige 13,5 bar ved kote 0. Fritt vasspeil vil ikkje ligge over kote 100 (det vil seie 10 bar ved kote 0) for resten av anlegget. Ein føreset vidare eit minimum vasstrykk på 2,5 bar ved eitkvart tappepunkt.

3.8 Ansvarsforhold
Kommunen har ikkje ansvar for ulempe eller skade hjå abonnenten eller på private leidnings-anlegg som skuldast svikt i vasstilførselen eller svikt i drifta av kommunen sitt leidnings-anlegget. Dette gjeld så sant ikkje svikt i vasstilførsel eller i drift av leidningsanlegget skuldast eit forsettleg eller aktlaust forhold frå kommunen si side.

 

Ei ulempe eller ein skade på kommunen sin eigedom som skuldast forsett eller aktløyse frå abonnenten si side eller personar som nyttar hans leidningsanlegg, har abonnenten sjølv ansvaret for.

For stikkleidningar som fleire eig i lag, har eigarane eit solidarisk ansvar for dei plikter dette reglementet legg på abonnenten. (Sjå dessutan pkt. 2.2.1 i dette reglementet.)