Elevane ved Nordbygda skule fekk ein ekstra lang skuleferie i år - første skuledagen starta nesten ni timar seinare enn vanleg ! Men då klokka var halv seks, møtte elevane - og dei fleste av foreldra - opp i gymsalen til ei felles samlingsstund for store og små. Her vart dei ynskt velkomen av lærarane, som song "Eg kan", med tekst av Ingvar Moe.
Etter at rektor hadde presentert dei nye lærarane, gjekk elevane og foreldra til kvar sine årssteg, for å kunne prate litt meir saman, og for å få meir informasjon.

Her fekk dei informasjon som handla om arbeidet på det einskilde årstrinnet, og dei fekk høve til å verte litt betre kjende med kvarandre, og med gamle og nye lærarar som dei skal samarbeide med i det komande skuleåret.
Det var ein del papir som skulle fyllast ut, men det vart heldigvis tid til å gjere meir uformelle og hyggelege gjeremål også.

Nokre av foreldra til elevane på femte til
sjuande årstrinn nytta høvet til å få litt
informasjon om masfjordskulane sitt
pedagogiske nettverk, om bruk av skolepost
og andre internettbaserte tenester, og om nokre
av dei mange gode og gratis dataprogramma
som eikvar kan hente frå nettet og gjere seg
bruk av.

Elevane fekk med seg arbeidsplan og nokre av bøkene med seg heim denne kvelden - og så var skuleåret i god gjenge.

Dei tilsette på skulen opplevde dette som ein fin start på skuleåret, og attendemeldinga frå ein del foreldre tyder på at vi ikkje er åleine om å oppleve det slik.

Bilete : Inger Amundsen Sleire og Berit Lygre
Tekst : Rune Garmann