Overskrifta var tema for Grunnskuleveka 2004. Det er mange tiltak ein kan setja i gang for å styrka samarbeidet heim-skule. På Matre skule gjorde me det på vår spesielle måte.

På eit FAU-møte tidleg i haust tok foreldra til orde for at dei kunne komma på skulen i Grunnskuleveka og kursa elevar og lærarar innan data. Lærarane syntest dette høyrde spennande ut, for me merkar alle at me har bruk for meir kunnskap til å gjera oss nytte av data som verktøy på mange felt. Lærarane sette opp ei ynskjeliste over kva dei kunne vera interesserte i å læra meir om, og kva det kunne vera nyttig å kursa elevar i. Me enda då opp med at lærarane i denne omgang ynskte vidare opplæring i teksthandsaming, bilethandsaming og programmet PowerPoint. For elevane var det bilethandsaming og PowerPoint som vart valt.

To foreldre fekk eit par veker til å førebu seg til tre halvannantimes økter for lærarane og to dobbeltimar for ungdomsskuleelevane. Lærarane la alt anna arbeid til side tre ettermiddagar og fekk prøva å vera elevar etter gammalt. Elevane fekk si dataopplæring konsentrert til ei 4-timarsøkt sist fredag. Resultatet har alle partar god grunn til å vera nøgde med. Dei to foreldra har brukt og bruker IT mykje og hadde mykje å læra oss lærarar. Powerpoint hadde ingen av oss prøvt noko særleg tidlegare, og sjølv dei som bruker pc-en mest, fekk læra ein del nye finessar til bruk i tekstbehandling. Dei to foreldra klarte og på ein glimrande måte å engasjera elevane og gje dei mykje ny kunnskap. Elevane avslutta sitt kurs med å visa ein PowerPoint-presentasjon i tekst og bilete av ulike sider ved skulen sin.

Stor takk til Arne og Kenneth som var sporty nok til å ta på seg oppdraget. Det var ei ny erfaring å bruka foreldre som lærarar på denne måten. Me har mange slags ressursar blant foreldra, og det er positivt å ha eit godt samarbeid også på dette området.

Matre skule ser behovet for å ha si eiga heimeside. Og viss me lærarane no tek i bruk og øver oss på det me har lært dei to siste vekene, skulle det vera mogeleg for oss å få til ei enkel heimeside om ikkje lenge. I alle fall viss me då og får like god hjelp frå foreldra.

Tekst og foto: Alf Strand